Að bera ábyrgð á orðum sínum

 

Tóta Pönk nefnir í bloggi sínu að hún hafi látið vera að lesa yfir viðtal sem Kolla Bergþórs tók við hana um Þórberg Þórðarson um daginn. Í hennar blaðamennskutíð hafi farið mikið í taugarnar á henni þegar fólk lúslas viðtöl sem tekin voru við það og breytti öllu því það kunni ekki að koma frá sér óbrengluðum setningum. 

Ég held að flestir blaðamenn geti tekið undir þessi orð Þórunnar Hrefnu. Ég get að minnsta kosti gert þau að mínum. Ég lít svo á að viðtal sem ég skrifa eftir einhverri manneskju, túlka í skrifum mínum þau áhrif sem manneskjan hefur á mig og hvernig hún kemur mér fyrir sjónir, sé mitt höfundarverk. Viðmælandi minn á ekki að fá að grufla í mínum texta og slíta allt úr samhengi.

Þetta er leiðinlegur siður og við blaðamenn ættum að afleggja hann eins og við komum honum á. Hér í gamla daga skrifuðu blaðamenn viðtöl og ekki tíðkaðist að þau væru lesin. Ég held að þannig sé það líka víða í útlöndum. Leiðréttið mig þið sem betur vitið ef það er ekki rétt hjá mér.

Þess vegna ætti fólk að gera sér ljóst að það er í viðtali og það sem það segir verður ekki aftur tekið, nema það taki það sérstaklega fram að það sem það segi sé off the record. Það á að bera ábyrgð á orðum sínum því blaðamenn eru ekki komnir til að tjatta bara um daginn og veginn.

Allt annar handleggur er að lesa yfir viðtöl við fólk í síma svo viðkomandi geti leiðrétt staðreyndavillur en ekki efnislega það sem blaðamaður skrifar. Þannig eru siðareglur Fréttablaðsins og DV sem Jónas Kristjánsson samdi, þess eðlis að ekki má senda óbirt viðtöl og fréttir út úr húsi. Á Fréttablaðinu á sínum tíma tókum við þessa reglu mjög alvarlega og fórum eftir henni. Lásum hins vegar yfir viðtöl í síma og það er sko allt önnur Ella því menn gera miklu færri athugasemdir þannig en ef það fær handrit í hendurnar og hefur frjálsar hendur með að grufla í texta. 

Athugasemdir

[farfuglinn (IP-tala skráð) 14.10.2006 kl. 01:48]

Ég hef bara unnið á einu dagblaði erlendis og skrifað fyrir erlent tímarit, en þar fengu viðmælendur aldrei handrit í hendur, né heldur var lesið fyrir þá í síma. Ef menn sögðu eitthvað við blaðamann þá var það "fair game" eins og sagt er, nema það væri sérstaklega tekið fram að það mætti ekki hafa eftir þeim.

Veit ekki hvernig þetta er almennt.

[Forvitna blaðakonan, 14.10.2006 kl. 12:27]

Takk fyrir upplýsingarnar. Þetta er eins og ég hélt. Þetta er leiðinda ósiður sem við blaðamenn höfum komið viðmælendum okkar upp á og gerir ekkert annað en tefja vinnu okkar og kemur niður á gæðum þess sem skrifað er. Ég ætla breyta þessu og ekki gefa mínum viðmælendum kost á að lesa nema í undartekingartilfellum

[ghs (IP-tala skráð) 14.10.2006 kl. 14:37]

Heyr, heyr!

[Valur Grettisson (IP-tala skráð) 16.10.2006 kl. 12:26]

Já þetta getur verið djöfuls hausverkur. En ég hef aldrei skilið að það megi senda viðtöl út úr húsi. Slíkt er hreinlega glórulaust.

[Forvitna blaðakonan, 16.10.2006 kl. 14:10]

Gott að finna að við Tóta pönk erum ekki einar um þessa skoðun. Blaðamenn ættu endilega að viðra skoðanir sínar hér, á hvern veginn sem þær eru. Og ekki aðeins hér, heldur ætti að vera öflugri umræða um þetta og svo margt annað sem viðkemur blaðamennsku innan BÍ.